Outro ano máis, os departamentos de Orientación dos IES de Ames, Brión e Xulián Magariños de Negreira, acompañados nesta edición polo IES do Milladoiro, organizan a Feira das Profesións que terá lugar o vindeiro 24 de abril de 2025 no Pavillón deportivo “Pedra Mámoa” de Negreira.
O horario será de mañá e tarde, en concreto de 9:30 a 14.00 horas e de 16.00 a 18.30 horas.
Pola mañá acudirá alumnado dos catro centros e pola tarde estará aberto a calquera persoa interesada que se poida achegar a coñecer as distintas opcións formativas e profesionais representadas na feira. En total está previsto que máis de 1.600 persoas visiten a feira ao longo do día.
Este ano puxemos especial interese, esforzo e ilusión na oferta vespertina para que traballadoras e traballadores, persoas desempregadas, estudantes de grao ou que xa finalizaron os estudos, poidan achegarse a coñecer novas vías de formación e/ou emprego. Pensamos que esta feira pode ser tamén interesante para as empresas da contorna e para as súas traballadoras e traballadores.
Convidámolos a que visiten a feira, na que contamos con diversas charlas que poden ser do interese dalgunha persoa da súa empresa (por exemplo, sobre acreditación das competencias profesionais) e con 64 expositores entre centros de FP, universidades, empresas e profesionais independentes, onde se poderán informar sobre as diferentes tendencias educativas e habilidades profesionais actuais. Ao mesmo tempo poderán formarse unha idea do potencial actual das novas xeracións que poidan ser do seu interese profesional.
